/95/
EXERCITATIO XIV
Qua Protagorae rationi respondetur nec non
primo Sectariorum argumento.
«Si Deus est, unde mala?» quaerit Protagoras.
«A nostra ‑ respondeo ‑ libera voluntate».
Primo Sectariorum argumento, si Deus
nostri est providus, cognoscit peccata, facit
igitur, respondet Boëtius, De consolatione
philosophiae, libro ultimo, cap. ultimo, negando consequentiam.
Probationem autem (scientia Dei causat
res) existimat esse falsam. «Nam ‑ inquit ‑ sicuti
videns aliquem moveri ad locum, de motione
certus, nihil tamen efficit neque ab ipso eunte
patitur, ita Deus non efficit futurum, etsi
illud cognoscat». Consentit et Alexander qui,
in libro De fato, cap. 16., rescribit aliud esse
praenoscere, aliud facere.
Sed, ne a respondendi labore subducere
nos velle videamur, verissimum dicimus hoc
axioma: «Scientia Dei causat res». Et rationibus
comprobamus. Nam, quod Deus alia a
se cognoscat, percipi a nostro intellectu nullatenus
potest, nisi quia Deus efficiat, quare,
cognoscendo seipsum esse causam, cognoscit
effectus. Hi namque in causa relucent. Vel